هاذي القصة للأسف – بحكيها بصوتي المقهور
خلت بركان القهر – إلي في داخلي يثور


كان الثامن من ذو الحجة – هو الموعد الحزين
يوم مصيبة عام الألف وأربعمية وثلاثين

اللهم لا اعتراض هذا القدر وإلي أنكتب
بس القهر لما يكون الإهمال هو السبب

أنا ما أطالب بالعوض لأنو العوض على الله
لكن كل إلي أبغاه ـ من قلبي أتمناه

هيا مجرد أسئلة للمسئول المجهول والمذهول من إلي صار
هل جهزتَ الأعذار؟ ـ هل صغت الاعتذار؟

هل حطيت نفسك مكان إلي عاشوا هذا القصة؟
أو مكان أي أم شافت ولدها جثة؟

أنا أسألك بالله على لسان كل شهيد كل غريق في السيول
من إلي ما اسعفهم العوم؟
هل انته مرتاح فعلا؟ هل بيجيك النوم؟
هل لقيت أي جهة ترمي عليها اللوم؟

هل صحي فيك الضمير ولا باقي ما اكتفيت؟
هل أخذت إلي تبغاه؟ هل شبعت؟ كم لميت؟
كم روح راحت؟ كم دمرت من بيت؟
جاوبني هل اكتفيت؟

إلي حصل باختصار جريمة لا تغتفر
نقطة سودة ـ على ثوب عروس البحر

الكل صار مستغرب فين بتروح المليارات
مشاريع ليل نهار على مدار الساعات

فين الثقة يا أهل الثقة؟ فين الوفى؟
هل باقي فيكم خير ولا انطفى؟

الحكومة ما بتقصر لا بالدعم ولا بالمال
قولوا ليش صارت جدة ضحية هذا الإهمال

المدينة السياحية للأسف بلا تصريف
أحياء تغرق وأرواح تزهق والأموات بالكوم والوضع فعلا مخيف
وانتا مآخذ منصبك تشريف ما هو تكليف

هل فعلا الفساد انتشر فينا وساد؟
هل ارتسمت البسمة على شفاه الحساد؟

لكن هانت ـ أبو متعب موجود
حط عينه عليكم يعني وقتكم محدود

كل مقصر راح يتجازَى - راح يتحاسب إلي يخون
لو صغير أو كبير لو يكون من يكون

ترى كلها أيام حتى يبانوا ويظهروا
هذا الوطن ما هو سلعة تبعوا فيه وتشتروا

الهدف من كلامي ما هو مجرد اعتراض
لأنو الهدف انتقاد يحد من الأعراض

والكل يعرف ايش أعراض الفساد
إلي صار اليوم علينا أشد من الإرهاب

الطمع والجشع دخل في القلوب الحية
والممنوع صار مشروع ـ وبلادنا الضحية

هذي المملكة ـ هذا الصرح والكيان
كيف تسمح لك نفسك ترضى عليها الأذية؟
ولآة الأمر أعطوك الأمان

حطوا فيكَ الثقة حطوا كامل الحرية
ما حد قصر معاك ما حد راجع وراك

قول لي ايش إلي خلاك إنك تخون الأمانة؟
قول لي ايش إلي أغواك وأجبرك على الخيانة؟

لكن جاك الأجل خلاص حانَ الأوان
لازم تدفع الحساب كما تدين تدان
لازم يرجع كل شي من بعدك زي ما كان

لازم تنظف البلد من أشباه المسئولين
لأنو مال هذا الوطن ما هو لعبة في الإيدين
خيانة الأمانة على مرأى من العين
ما يرضاها لا إنسان ولا وطن ولا دين

يفداكي قلبي وروحي
زادت يا جده جروحي
يا جده لا ما أنسى

ما أنسى مر ألامك
وإلي خان و ماصانك
يا جده لا ما أنسى